阿寶的部落格

迄號(hit4 lo7)蛇傳迄號卵 鄭 吉 竣

佇古早農業時代，有一個做穡人名做阿火仔，伊規年透冬攏咧種田，罕得去城內佚陶，有一工，伊雄雄想著欲去京城，所以著吩咐怹（in1）某講:「我欲去一逝京城，我共全部的內褲攏紮去矣，轉來的時，汝愛共我做幾領仔內褲，抑若無，我著無通好換矣！」講了，伊著上京去矣。

有一工，怹某想著阿火仔的吩咐，著開始欲做內褲矣，毋擱，伊煞袂記得阿 火仔的大腿有偌大?伊真煩惱，著佇門口行來行去，斡一下頭，看著一支電火柱，心內想講:迄支電火柱佮阿火仔的大腿差不多大，所以伊著真歡喜提著麵粉袋仔 布佮針線，走去電火柱邊，共布縫（thinn7）佇電火柱頂懸（kuan5），煞剝袂落來。

隔天光日，阿火仔倒轉來，著問怹某講:「我的內褲咧 ?」怹某講 :「佇門口 的電火柱頂懸，剝袂落來。」阿火仔真受氣講 :「我哪會娶著則爾戇的某咧?若無來投予丈姆仔聽，實在是毋甘願。」講了，著走去揣丈姆仔。

阿火仔去到丈姆仔的厝，厝內攏無人，伊著走去菜園仔揣，去到菜園仔，看 著丈姆仔佇遐圍籬笆，伊想欲入去，毋擱攏揣無門，原來是丈姆仔共家己圍佇內 底，阿火仔看了，搖頭講:「噯！迄號蛇傳迄號卵」。

註解：迄號：那種。迄號蛇傳迄號卵：有其父必有其子。做穡人：農夫。
規年透冬：一年到頭。佚陶：遊玩。一逝：一趟。紮去：帶去。
斡：轉。電火柱：電線桿。頂懸：上面。剝袂落來：取不下來。
則爾戇：這麼笨。丈姆仔：岳母。揣：找。佇遐：在那裡。