阿寶的部落格

痛惜咱臺灣的鳥仔 鄭吉竣 93.06.05
刊佇海翁台語文雜誌82期2008.10（原稿標TLPA拼音，刊出標台羅）
汝敢知影咱臺灣的鳥仔賰（chun1）偌濟？有在地，有人客，有野生，有人飼的，毋管是佗一個，阮攏愛共痛惜，予怹（in1）蹛（tua3）著真好勢，毋通來破害怹咧討食的樹林佮濕地，嘛毋通掠來食落腹肚底，按呢，才會愈湠愈濟，人客嘛會愈愛來作客。

講著好人客烏面撓杯，咱著真見笑擱歹勢，舊前年九十一年底，怹仝款歡歡喜喜，飛來曾文溪作客，哪會知影食了魚蝦，一隻一隻頭犁犁，四肢無力倒落地，袂輸是著雞災，哪會按呢？敢是有人共毒下？抑是咱共破害濕地？主管機關查詳細，水質佮鳥屎提來做檢體，擱來解剖怹的屍體，原來是濕地破害佮肉毒桿菌的問題。

培墓 鄭吉竣

清明迄一工透早，阿明看阿爸咧無閒著問伊講：「是按怎咱逐冬攏愛培墓咧？」

阿爸講：「你敢無聽人講『食果子著愛拜樹頭』。培墓著是數(siau3)念祖先、感恩祖先啊！佇培墓即工，咱規家伙仔大大細細攏會轉來，借即個機會，大人會當參詳一寡代誌，囡仔嘛會當做伙耍，逐家的感情毋才會愈來愈好。」

五 月 節 鄭吉竣

「阿英兮（e0）！今仔日是五月節，趕緊來共阿媽鬥縛（pak8）肉粽！」阿媽大聲咻（hiu1）阿英來鬥跤手。

「阿媽！今仔日敢毋是肉粽節？汝哪會講是五月節咧？」阿英問阿媽。

四十冬的鏡 鄭吉竣（刊佇 掖種台語社通訊35－39期）

四十冬前，我是小學一年仔，厝裡真散擱有負債，食穿足凊（chin3）彩，食四秀仔是免數(siau3)想。

有一擺，考試第一名，阿公真歡喜，予我兩角銀。我著用走兮，走去庄仔內的簳（kam2）仔店，著共店頭家阿伯仔講：「共恁買兩角紅甘蔗。」阿伯仔削紅甘蔗予我擱找我八角。我咧臆，伊定著看做一箍兮，因為迄時的兩角佮一箍差不多平大個。我共物件接過手了後，真驚去予伊想著，擱共八角討倒轉去，著趕緊走轉來厝。看著手裡的八角銀，我著咧想，一支冰枝兩角，一工買一支，會當食四工，心內誠歡喜。