四十冬的鏡 鄭吉竣（刊佇 掖種台語社通訊35－39期）
四十冬前，我是小學一年仔，厝裡真散擱有負債，食穿足凊（chin3）彩，食四秀仔是免數(siau3)想。
有一擺，考試第一名，阿公真歡喜，予我兩角銀。我著用走兮，走去庄仔內的簳（kam2）仔店，著共店頭家阿伯仔講：「共恁買兩角紅甘蔗。」阿伯仔削紅甘蔗予我擱找我八角。我咧臆，伊定著看做一箍兮，因為迄時的兩角佮一箍差不多平大個。我共物件接過手了後，真驚去予伊想著，擱共八角討倒轉去，著趕緊走轉來厝。看著手裡的八角銀，我著咧想，一支冰枝兩角，一工買一支，會當食四工，心內誠歡喜。
天光早起，欲去學校讀冊，我毋敢經過簳仔店，攏愛踅一大輪，去到學校，有時仔攏會袂赴。尾矣，無法度，嘛是愛經過簳仔店，逐擺行到店門口的時陣，攏驚去予阿伯仔認出來，共八角討轉去，著共頭斡邊仔，用走兮去學校。一禮拜了後，我心內想講，穩當阿伯仔毋知影，若無，伊定著會來阮兜討。
為著欲刺探阿伯仔知抑毋知？天光日欲去讀冊的時，行到簳仔店門口，著共阿伯仔拽手，阿伯仔嘛共我笑一下。迄個時陣，才真正共心肝頂的石頭提落來，講一聲，好佳哉。自細漢的時，阿公、阿媽佮父母攏教阮做人愛老實，袂使共人偏(phinn1)，我嘛知影按呢做，毋著，毋擱看著八角銀，啥物攏嘛袂記得了了矣。
代誌過了後，我定定咧想，為著八角銀，去予迄塊石頭硩一禮拜，敢有價值？自迄擺了後，我著共伊當做一面鏡，提來照家己的良心，千萬袂使擱做毋著。即面鏡已經用四十冬矣！我扑算欲共用一世人，擱欲共傳予囝孫，共伊當做是「傳家之寶」。
註解：散：貧窮。凊彩：簡單樸素。數想：奢想。簳仔店：雜貨店。一箍：一元。迄時：那時。冰枝：冰棒。踅一大輪：繞一大圈。袂赴：遲到。斡：轉。拽手：招手。共人偏：佔人便宜。定定：常常。硩：壓。做毋著：犯錯。扑算：打算。
留言列表
