阿寶的部落格

汝摃阮囝，我嘛欲摃恁囝 。 鄭吉竣

較早，有一個阿公仔，名做阿巧仔。伊的囝，名做阿呆。伊的孫，名做阿戇。

有一工，阿公仔提二十箍銀予阿戇，叫伊去店仔買十箍糖佮十箍鹽。阿戇去到店仔的時，煞毋知欲用叨十箍買糖？叨十箍買鹽？所以伊著走倒轉來問阿公。阿公聽了真受氣，叫伊共二十箍做伙提予店頭家，店頭家著會予伊糖佮鹽。

阿戇著照阿公的交代，共二十箍提予頭家，頭家著共糖佮鹽提予阿戇。即時陣的阿戇，煞毋知欲用叨一手提糖？叨一手提鹽？所以伊著共物件囥咧，趕緊走轉來問阿公。阿公聽了氣甲擋袂稠，著舉薰吹摃阿戇的頭殼，摃一下，腫一丸。阿戇著走去埕尾仔的樹跤，哭甲嗎嗎哮。

即時陣，阿呆拄好對外口轉來。知影阿戇予怹（in1）阿公摃頭殼的代誌了後，著佮阿戇做伙去揣阿公仔。一見面，阿呆著欲共怹老爸借迄支薰吹，阿公仔問講：「汝借薰吹欲創啥物？」。阿呆講：「汝借我就著啦！」。阿呆借著薰吹了後，著對家己的頭殼大大力摃落去，摃甲頭殼腫幾偌丸，擱對怹老爸講：「汝摃阮囝，我嘛欲摃恁囝！」。

註解：二十箍銀：二十塊錢。擋袂稠：受不了。薰吹：煙斗。