阿寶的部落格

布袋戲短劇：踅六合夜市 鄭吉竣


虎鼻獅：「毋是臭彈烏白蓋，阮的鼻仔上界利（lai7），好食物件佇佗位，小可鼻咧阮隨知。阮是人，毋是獅。因為鼻仔傷過利，所以人攏叫阮『虎鼻獅』。啊！凊採凊採啦！有通食，上實在。管伊是虎抑是獅？」

愛食鬼：「國內國外拋拋走，世界名產食透透，聽著一定行跤到，看著未食喙瀾流。阮咧食物件是緊擱大喙，定定食甲大心氣（khui3），所以人攏笑阮是『愛食鬼』。唉！管伊啥物鬼？共食予肥肥，激予槌槌，穿予嫷嫷，逐工來去遊山玩水！行！緊來去！」

虎鼻獅：「愛食鬼！汝欲去佗位？」
愛食鬼：「欲來去遊山玩水，順紲揣好食物來推（thui1）。」
虎鼻獅：「我有鼻著一個所在，遐有真濟好食物，各地名產一大堆。」
愛食鬼：「緊講啦！到底是佇佗位？」
虎鼻獅：「著是咱高雄的六合夜市。」
愛食鬼：「我若聽著好食物，喙瀾著強欲滴。行！行！行！緊來去！」
虎鼻獅：「真正是愛食鬼。好啦！我佮汝鬥陣去！汝那行那聽我來紹介。六合夜市上氣派，國外貴賓嘛攏知，好食衛生人人愛，逐家食甲笑咍咍。」
愛食鬼：「哇！山珍海味排甲規路邊，有蚵仔煎、擔仔麵、筒仔米糕佮魠魚羹（kinn1），擱有……囌！哈！（吞喙瀾聲）」
虎鼻獅：「愛食鬼著是愛食鬼，即張面紙予汝啦！」
愛食鬼：「予我欲創啥物？面紙敢會食得？」
虎鼻獅：「是欲予汝拭喙瀾兮啦！」
愛食鬼：「迄爿擱有涼水、咖啡佮木瓜牛奶。即爿有火鍋、牛排、棺材枋佮臭豆腐，真正是應有盡有。」
虎鼻獅：「愛食鬼！今仔日，咱著盡量推（thui1），免細膩，共伊食予夠氣（khui3）夠氣。我請（大聲講），汝出錢（細聲講）。」
愛食鬼：「好！好！好！多謝汝。」
虎鼻獅：「免客氣！免客氣！」
愛食鬼：「讚！讚！讚！有人請，我著盡量推。」
虎鼻獅：「愛食鬼！緊付錢！」
愛食鬼：「虎鼻獅！汝毋是講汝欲請？」
虎鼻獅：「是啊！我請，汝出錢啊！」
愛食鬼：「我出錢喔！無採工我推則大堆。」
（結束） （註解：推：吃。）