阿寶的部落格

阿 母 的 愛 鄭 吉 竣92.11.15

感 謝 阿 母 汝 的 愛，細 漢 共 阮 搦 尿 屎，
厝 散 無 錢 補 月 內，阮 吸 無 奶 大 聲 哀，
日 時 穡 頭 逐 項 來，擱 愛 揹 阮 來 煮 菜，
暝 拖 日 磨 身 體 害，消 瘦 落 肉 行 袂 在，
無 手 無 頭 上 悲 哀，身 苦 病 痛 著 忍 耐，
大 家 苦 毒 袂 諒 解，無 錢 通 好 買 藥 材，
宓 佇 房 間 流 目 屎，有 時 艱 苦 哭 出 來，
有 時 強 忍 吞 腹 內，無 怪 大 家 歹 款 待，
只 怪 家 己 命 運 歹，阿 母 艱 苦 阮 攏 知，
定 定 綴 咧 流 目 屎，偷 罵 阿 媽 心 肝 歹，
阿 母 聽 著 講 袂 使，偷 罵 序 大 不 應 該。

四 書 五 經 無 熟 似，人 情 義 理 誠 瞭 解，
有 孝 序 大 勤 奉 待，痛 惜 序 細 無 限 愛，
三 從 四 德 照 步 來，即 款 女 性 上 偉 大。

心 地 善 良 食 長 齋，逐 工 燒 香 佮 拜 拜，
佛 號 禮 節 無 瞭 解，阮 做 老 師 上 大 牌，
一 暝 一 字 慢 慢 來，一 字 唸 欲 百 外 擺，
定 定 走 音 笑 咍 咍，唸 了 走 音 擱 再 改，
改 甲 哈 唏 撐 下 頦，汝 的 虔 誠 天 神 知，
汝 的 善 良 天 神 愛，助 汝 佛 號 記 在 在。

較 早 艱 苦 強 忍 耐，向 望 食 老 好 命 來，
後 生 新 婦 來 款 待，過 著 輕 鬆 擱 自 在，
誰 知 運 命 則 爾 歹，半 暝 跋 倒 浴 間 內，
骨 頭 受 傷 足百 袂 來，大 聲 喝 咻 阮 才 知，
載 汝 注 射 食 藥 材，行 路 著 愛 靠 舉 柺，
拄 才 小 可 較 清 彩，擱 佇 客 廳 跋 一 擺，
即 聲 跋 甲 誠 厲 害，坐 袂 稠 嘛 徛 袂 在，
袂 當 家 己 放 尿 屎，揉 洗 身 軀 別 人 來，
阮 愛 上 班 趁 錢 財，毋 知 按 怎 來 排 解，
好 得 阿 爸 佇 厝 內，共 汝 照 顧 佮 痛 愛。

一 生 行 善 做 好 代，好 心 好 報 天 理 在，
祈 求 天 神 來 消 災，厄 運 緊 過 好 運 來。