阿寶的部落格

我歇熱的生活 （講演：得寶林、寫稿：鄭吉竣）2005.03.12

各位評審老師逐家好，我是○○○，今仔日，我欲講演的題目是「我歇熱的生活」「我歇熱的生活」。

歇熱，是阮學生囡仔上歡喜的日子，因為毋免去學校讀冊，會當睏甲日頭曝尻川，嘛毋免準備考試，會當逐工無煩無惱，食甲親像阿不倒！

即擺的歇熱，實在真趣味！我的心內有講袂出來的歡喜。會記得歇熱拄仔開始，阿爸著載阮規家伙倒轉去庄跤，阿公看著阮，一個喙仔是笑咍咍。阿媽看著阮，著趕緊走去灶跤煮腥臊，伊煮食的功夫，是無輸辦桌的總舖師喔！一下仔手爾爾，著排甲規桌頂攏是上好食的料理，予阮逐家食甲喙笑目笑，特別是迄盤菜脯卵上好食，到即碼，我若想著猶擱會流喙瀾咧！請恁逐家看我的喙角，吸……啊！（做吸喙瀾、吞喙瀾的動作）。

阿公逐工透早著去菜園仔掖肥佮沃水。有時陣，我嘛會去共阿公鬥沃菜、鬥摳草，擱掠菜蟲予鴨仔食，實在是足心適兮！

下晡時仔，阿公攏會騎鐵馬載我佮小妹去四界踅，小妹看著水牛，竟然共伊當作是大象；看著細隻杜蚓仔，講是家蠽（蟑螂）咧氅鬚；看著鱔魚，掠準是蛇，煞驚甲皮皮掣，擱大聲哮出來，予我佮阿公感覺真好笑嘛誠毋甘。

紲落來，阿公擱導阮去溪仔底耍水、拍滂泅，〔足百〕起去樹仔頂掠金龜，佇草埔仔內拈田嬰，我佮小妹耍甲歡喜粅粅的時。雄雄聽著阿公講，日頭欲落山矣！咱緊轉來！

食暗頓了後，阮逐家攏夯椅頭仔坐佇埕尾仔，一面納涼，一面聽阿公講較早的代誌，阿公講，阿爸細漢的時陣，定定去田裡掠鰗鰡，舞甲規身軀攏是漉糊仔糜，逐擺倒轉來，攏愛偷偷仔對後尾門入來，抑若無，若予阿媽看著，著愛食「竹仔枝炒肉絲」。我佮小妹聽了，感覺足好笑兮！著斡頭共阿爸講，原來阿爸汝細漢的時，嘛是赫狡怪喔！阿爸歹勢歹勢，毋擱嘛是笑甲喙仔裂獅獅。

涼風一陣一陣吹來，田蛤仔聲，呱！呱！呱！，哇啊！真正是無輸佇音樂廳吹冷氣聽樂隊咧演奏，實在是有夠享受兮！莫怪阿公佮阿媽的身體會赫爾康健。


當逐家咧欣賞大自然的音樂的時陣，拄好有幾隻仔火金姑飛過，我佮小妹著開始唸迄首火金姑的童謠：「火金姑，來食茶，茶燒燒，食芎蕉，芎蕉冷冷，食龍眼，龍眼愛擘殼，換來食那菝，那菝全全籽，害阮食一下，落喙齒。」唸煞了後，阿公講，真暗矣！逐家來去睏。

即擺的歇熱，予我過著神仙的生活，擱學著真濟鄉土文化的知識，實在有夠歡喜，學校一下開學，我著隨佮全班的同學做伙分享。

我的講演到遮，多謝各位評審老師。