歲月 鄭吉竣
（刊佇海翁台語文學雜誌71期）（刊佇安平劍獅埕詩牆-台語詩100首）
自盤古開天彼一工
佇天公殿
通過唯一的雕刻師傅認證了後
到今
猶閣無人提著第二張牌
所以
上帝宣布永遠無欲閣招考矣
因為
阮做工課頂真 手路閣真幼
堅持刻出原汁佮原味
雖然
有化妝師咧抗議
有油漆工咧踅踅唸
阮決定毋讓步
毋管
五年 六月 七日 八時
攏照起工來
一刀一痕 毋捌貧惰
無論
乞食抑皇帝
仝款無大細心
一刀一痕 毋捌重耽
阮
毋捌收紅包
你
恐嚇嘛無效
拜託姑情攏總無彩工
（註解）五年：五十之後年年衰退。 六月：六十之後月月衰退。
七日：七十之後日日衰退。 八時：八十之後時時衰退。
貧惰：偷懶。 重耽：錯誤。 姑情：求情。
全站熱搜
留言列表
