阿寶的部落格

李田螺的故事 （瑞祥國小校內賽第一名）演講：羅永晴 寫稿：鄭吉竣 2008.05
各位評審老師逐家好，今仔日我欲講的故事是「李田螺的故事」。

佇清朝時代，咱台灣有一个真有錢的張員外，伊有三个查某囝，大漢的佮第二的攏嫁予城內的好額人，干但賰第三的猶未嫁。這个第三查某囝，毋但生做媠閣溫柔，心肝嘛真善良，逐家攏呵咾甲會觸舌。伊佮別人無仝款，袂數想榮華富貴。張員外想欲共伊嫁予好額人，毋閣伊攏無愛。張員外真受氣講：「嫁好額人你無愛，我規氣就共你嫁予散食人」

有一工，張員外佇街仔路，看著一个穿甲破糊糊的少年人咧賣田螺，員外著問伊講：「賣田螺的！你叫啥物名？」少年人講：「我哪有名？逐家攏嘛叫我李田螺。」張員外感覺真好笑，哪有人連家己的名攏毋知？張員外閣問：「你娶某未？」李田螺搖頭講：「我遮爾散，哪有人欲嫁我？」張員外講：「既然你猶未娶，我著安排我的第三查某囝佮你對看」

　　張員外原本是想欲予查某囝食淡薄仔苦，想袂到伊看著李田螺真古意，應該是會當倚靠終身，所以著同意這門親事。結婚了後，李田螺逐工搰力抾田螺、賣田螺。有一工透早，李田螺欲出門的時，雄雄烏天暗地閣落大雨，雨停了後，李田螺毋敢貧惰，照常出門去。毋閣溪仔漲大水，無法度抾田螺，李田螺真失望坐佇樹跤咧食薰。著佇這个時陣，伊看著溪仔浮一寡會發光的物件，伊順手共薰頭擲佇頂面，想袂到薰頭無化去，顛倒是愈來愈炎，伊著想講：「抾無田螺，抑無共撈一寡轉來，凡勢會當用來點火，嘛通好省一寡燈油錢。」

　　有這款物件了後，李田螺就毋免閣開錢買燈油矣！厝邊隔壁攏感覺真奇巧，逐家著攏共買轉去點火。因為利純真好，所以李田螺就改途撈這款會發光的物件。

　　有一个廣州的生理人知影了後，著揣李田螺做伙挖這款會當代替燈油的物件，原來李田螺撈著的是真好價的石油，李田螺著按呢趁了真濟錢。有錢了後的李田螺仝款過著簡單的生活，所以連親情朋友嘛毋知影in已經變做好額人矣。

　　有一工，李田螺的丈人做生日，食飯的時陣，大姊夫佮二姐夫著刁工講：「有傷濟土地實在有夠煩，規氣共土地賣賣咧」李田螺聽著就隨開喙講：「兩位姊夫恁敢真正欲賣土地？若欲賣，賣我！」逐家聽著攏笑甲攬腹肚。大姊夫講：「我的土地無一萬嘛愛八千，你敢有遮濟錢？你若有，我賣你半價就好！」二姐夫嘛講：「你若會當隨提錢出來，我的土地嘛賣你半價就好。」李田螺就對伊的橐袋仔提出幾仔張銀票，兩个姊夫看一下規个人攏愣去，真後悔拄才講的話。

這个故事共咱講「天公痛戇人」，嘛共咱講「圓人會扁，扁人會圓」只要咱認真拍拚，總有一工會出頭天。

我的故事講到遮，多謝各位。