阿寶的部落格

考試的時陣 鄭吉竣（刊佇海翁台語文學雜誌85期2009.01） 各位老師、各位同學逐家好，我是五年仁班的王榮德，今仔日我欲演講的題目是「考試的時陣」、「考試的時陣」。 考試原本是真平常的代誌，是欲予咱知影佇這段時間老師共咱教的物件，咱學會曉偌濟？啥物所在會曉？啥物所在袂曉？袂曉的所在，後擺著愛閣較認真、閣較拍拚咧。 毋閣，逐擺若是到考試的時陣，真濟人攏足緊張的，有的人是咧驚伊若是考無好，轉去厝裡著愛食「竹仔枝炒肉絲」。有的人是咧煩惱伊若是考無好，著袂當提著獎品。毋閣，嘛是有人一點仔攏袂緊張，遮的人有的是無要無緊，抱著「時到時擔當，無米才煮番薯箍湯」的心理，到時若是考無好，管伊竹仔枝是欲炒肉絲抑是欲炒魷魚絲。另外，有的人是親像「土地公毋驚大風吹---老神在在」，因為伊平常時仔上課著誠認真，拄著袂曉的所在，著趕緊去問老師問甲會，所以考試的時陣伊攏袂緊張。 考試的時陣，若是平常時有準備的人攏恬恬仔寫考試紙，這叫做「樹頭徛予在，毋驚樹尾做風颱」。若是平常時無準備的人著會真緊張，有當時仔頭殼閣會越來越去，目睭尾捽來捽去，數想欲偷看別人的。這叫做「平常時若凊凊彩彩，時到著欲哭無目屎」。 俗語講：「有食藥有行氣，有燒香有保庇」，這句話的意思是咧講咱若是平常時仔存好心、加做一寡好代誌，天公伯仔一定會共咱保庇。換一句話來講著是咱若「平常時有準備，著毋免煩惱考試」，顛倒會感覺考試是真刺激、真趣味的代誌，你講著毋著？是毋是？ 我的演講到遮，多謝各位。